O Secretario de Movementos Sociais e de relacións coas ONG do PSOE, Pedro Zerolo, celebrou hoxe o Acordo do Consello de Ministros polo que mediante unha Declaración Institucional polo Día Internacional contra a homofobia e a transfobia insta á Organización Mundial da Saúde (OMS) a eliminar a transexualidade da Clasificación Internacional de Enfermidades. “O mantemento desta situación é un anacronismo que non responde a evidencia científica ningunha pero que está a ser utilizado para a estigmatización, persecución e represión das persoas transexuais en moitas partes do mundo”, indicou.
O responsable socialista sinalou que as persoas transexuais son, de acordo cos informes da Unión Europea, “unha das poboacións máis vulnerables á exclusión e á discriminación en Europa especialmente no acceso ao emprego e aos servizos” e por iso se encontran entre os sectores de actuación que establece o Plan Nacional de Acción para a Inclusión Social 2008-2010 aprobado polo Goberno socialista.
Zerolo sinalou que o noso país será o vindeiro mes de xuño a sede do I Encontro mundial sobre os dereitos humanos das persoas transexuais, impulsado por distintas organizacións nacionais e internacionais de dereitos humanos co apoio do Goberno de España.
Finalmente, o dirixente socialista lembrou que o Consello de Ministros aprobou o pasado mes de xuño a declaración do 17 de maio como Día Internacional contra a homofobia e a transfobia, instando a Nacións Unidas a recoñecer este día internacional de loita contra a discriminación por motivos de orientación sexual e identidade de xénero.
No hay comentarios:
Publicar un comentario