O grupo LGTB do PSdeG valora a resposta da RAG ante a petición do cambio da acepción da palabra “pederasta” polas súas connotacións homófobas

O grupo LGTB do PSdeG valora a resposta da RAG ante a petición do cambio da acepción da palabra “pederasta” no diccionario polas súas connotacións homófobas

LGTB enviou tamén unha carta á RAE e iniciará unha campaña para instar ao cambio da definición do seu diccionario

Santiago de Compostela, 10 de decembro de 2009.- O grupo de lesbianas, gays, transexuais e bisexuais (LGTB) do PSdeG valorou hoxe a resposta recibida pola Real Academia Galega ante a solicitude do cambio da definición da palabra “pederasta” do diccionario polas súas connotacións homófobas.

O grupo LGTB do PSdeG enviou sendas cartas á Real Academia Galega e á Real Academia Española, solicitando o cambio da acepción da palabra “pederasta” nos diccionarios de lingua galega e española, nos que aparece entre as definicións as de “home que mantén relacións homosexuais con nenos” e sodomita. Por ext., homosexual masculino”.

O grupo LGTB solicitou o cambio inmediato desta acepción xa que “non é lóxico nin de recibo que no século XXI se manteña unha definición tan rancia e homófoba” na que se vincula a “pederastia” coas relacións homosexuais “cando na realidade prodúcense casos tanto heterosexuais como homosexuais, non tendo sentido facer esa puntualización e sendo máis correcto un texto máis neutro, referíndose a relacións sexuais con nenos sen especificar que sexan exclusivamente homosexuais como se fai agora”.

Así mesmo, a plataforma fixo unha chamada de atención aos académicos “xa que deberían ser eles os que se percatasen desta incorrección, xa que teñen o deber de velar polo uso correcto da lingua”.

A Real Academia Galega respondeu mediante unha carta ao colectivo, na que “agradece a observación” e afirma “concordar plenamente co seu contido”. Na misiva, o secretario da RAG anuncia o cambio “inmediato” desta definición, “así como dalgunha outra que non se adapta á realidade da sociedade actual”.

A RAG expresou as súas escusas “por seguir os criterios dos diccionarios mais importantes de linguas do noso contorno” e expresou o seu “mais firme compromiso” co respecto “dos dereitos humanos, dos dereitos dos pobos, dos dereitos dos grupos e colectivos sociais, e que trata de eliminar das súas obras todo aquilo que poida implicar discriminación por razón de sexo, de ideoloxía ou de relixión”.

Outras definicións
O LGTB amosou hoxe a súa satisfacción pola pronta rectificación da RAG, que non só cambiou a definición de “pederasta”, senón outras mais que tamén podían implicar connotacións discriminatorias.

A plataforma do PSdeG considerou que a “actitude progresista” amosada pola RAG debe ser a mesma que adopte a RAE, adaptando algunhas das definicións do seu diccionario á realidade social do país, como no caso da acepción de “matrimonio”.

O colectivo lembrou que tamén se dirixiu á RAE, da que polo de agora non obtivo resposta, e anunciou que recabará o apoio dos militantes e simpatizantes, e da cidadanía en xeral, solicitándolles que envíen tamén as súas misivas instando á RAE a adaptar esta definición e eliminar a súa connotación homófoba.


Un saúdo. Gabinete de Comunicación PSdeG-PSOE